Vedra acolle esta fin de semana a nova edición da mostra e os cursos tecnolóxico-audiovisuais do LAV

Esta fin de semana celébrase a oitava edición do Laboratorio Audiovisual de Vedra, o LAV015 do que hai que salientar entre outras cousas o seu programa formativo dunha ducia de cursos sobre diferentes aspectos da creación audiovisual botando man das novas tecnoloxías. Pois ben, a nova edición do LAV (organizada como de costume por Senunpeso) arranca o venres coa proxección de Funes, o inventor da lúa, de Enrique Otero, dando comezo á mostra que complementa o programa formativo e que abrangue tamén a xornada do sábado. De xeito paralelo, a partir do sábado, desenvólvense as xornadas de formación, nas que máis de 160 persoas están inscritas nos once obradoiros que se imparten este ano no CPI de Vedra.

A devandita mostra ábrese pois o venres 6 de febreiro ás 20:30 horas no Centro Sociocultural de Vedra, con entrada de balde. As proxeccións desa xornada son: Funes, o inventor da lúa, de Enrique Otero, O labirinto dos soños, de Ramón Bermejo e Pepe Sendón, e Flores para unha rosa, unha curtametraxe de animación realizada polo alumnado do CPI de Vedra. O sábado, de novo no Centro Sociocultural de Vedra, o director Alfonso Zarauza e membros do grupo Chévere estarán presentes para presentar A viaxe dos Chévere.

O sábado e o domingo, durante todo o día, desenvolveranse as xornadas de formación audiovisual, que atraen a profesionais e afeccionados de toda Galicia e incluso de fóra. Máis de 160 persoas participan este ano nos once obradoiros programados, entre os que se inclúen un de introdución ao hardware libre Arduino e outro de creación audiovisual con trebellos móbiles.