Unha 'app' mellora a comunicación de persoas con discapacidade cognitiva

A aplicación Easy Communicator (ECO), que se deseña na Escola Politécnica Superior de Enxeñaría de Vilanova i a Geltrú (EPSEVG) no marco da Cátedra de Accesibilidade da Universidade Politécnica de Cataluña, vai dirixida a nenos con trastornos do espectro autista, adolescentes con parálise cerebral e xente maior con problemas cognitivos. A finalidade do proxecto é que estas persoas poidan comunicarse e aprender con máis facilidade.

"O desenvolvemento céntrase en dúas vertentes: por un lado, a programación do aplicativo informático e, por outro lado, a definición dos elementos de comunicación que utiliza", explica Daniel Guasch, director da Cátedra de Accesibilidade da UPC e profesor do Departamento de Enxeñaría Telemática.

A aplicación estará dispoñible para tablets IOS e Android, e prevese que este mes de decembro estea operativa unha primeira versión de proba para ambos os dous sistemas. O Equipo de Asesoramento e Orientación Psicopedagóxica do Garraf e a Escola Marta Mata del Vendrell "avaliarán as carencias desta primeira versión porque dende a Cátedra poidamos pulir os detalles", afirma Daniel Guasch.

Easy Communicator ten como elementos de comunicación a combinación de fotografías, pictogramas, vídeos, textos e voces. Así, pois, as mensaxes ofrécense en formatos alternativos complementarios. "Para indicar o concepto escola, por exemplo, pódese optar por unha combinación personalizada da fotografía da escola do usuario, o pictograma xenérico, o vídeo da palabra escola en lingua de signos, a palabra lida e o texto", engade o director da Cátedra de Accesibilidade.

O aplicativo permite tanto incorporar fontes externas, coma utilizar recursos que fosen obtidos polo mesmo usuario. Segundo Daniel Guasch, "o sistema ten en conta que existen coleccións de pictogramas, voces e vídeos, algunhas de libre utilización, como as do portal de recursos gráficos ARASAAC, e outras propias de cada usuario,".

O que diferencia o proxecto ECO doutras aplicacións existentes similares é a interacción que proporciona co usuario, xa que o aplicativo está concibido como un xogo. Tamén inclúe a posibilidade de xerar e compartir contido personalizado de forma flexible, e, ademais, é unha plataforma aberta e gratuíta.

O proxecto realízano estudantes e profesores da UPC coa metodoloxía de aprendizaxe-servizo, é dicir, investigan buscando solucións para casos reais. Na programación dos aplicativos participan estudantes do grao de Enxeñaría Informática da EPSEVG, mentres que na definición e creación dos elementos de comunicación traballan estudantes do grao de Deseño Industrial e Desenvolvemento do Produto da mesma escola.