A plataforma de saúde "Personas Que" arrinca a súa internacionalización

Convencidos de que era posible aborda-la enfermidade dende un punto moito máis próximo e humano, un grupo de españois lanzáronse á aventura de "Personas Que", unha plataforma que, en palabras do seu CEO e director xeral, Tomás García, "busca tratar aos pacientes como persoas". Trátase dun proxecto que se presenta como punto de encontro, non só de pacientes de determinadas enfermidades (diabetes, trastorno bipolar, transplantes, alzhéimer, artrites, epilepsia, psoriasis"), senón tamén das persoas que os coidan ou da súa contorna máis próxima como amigos ou compañeiros de traballo. Un espazo no que poder informarse, compartir experiencias ou, mesmo, monitorizar as variables da súa enfermidade concreta.

O proxecto, 100% español, alumouse en 2011 no seo da multinacional Publicis Healthcare Communications Group (PHCG) e, tras dous anos funcionando en Internet, preto de dous millóns de euros de investimento e diversos premios ás súas costas (entre eles varios galardóns ASPID da saúde) acaba de independizarse e operar como empresa independente baixo o nome de People Who Global.

Tomás García non pode oculta-la súa satisfacción pola boa acollida que tivo nas asociacións de pacientes e, de feito, 13 delas colaboran xa coa plataforma e máis de 50 participan de forma activa nas diferentes seccións. Este é o modo con que se lograron xa máis de 8.600 usuarios rexistrados e, só durante o pasado mes de setembro, máis de 35.000 visitas únicas e máis de 100.000 páxinas vistas.

Vocación global

A expansión internacional do proxecto xa é unha realidade, arrincando a plataforma en Italia e Alemaña e, antes de que acabe o ano (presumiblemente en novembro), cos ollos postos en Reino Unido e Francia. Queda para os final EEUU, de cuxo mercado García apunta que "non lle tememos, pero si nos infunde respecto". Ao final de contas, trátase dun mercado cunha lexislación distinta á europea "o cumprimento coa lexislación ten un papel protagonista neste proxecto" e, tal e como apunta Baonza, "cunha relación médico/paciente moi diferente".

Lanza-la plataforma noutros países non resulta tarefa sinxela, posto que non só é preciso contar cun representante que desenvolva negocio (o que no seu caso é unha procura intensiva de patrocinios), senón que resulta crucial establecer relacións con asociacións de pacientes e contar con persoal médico nativo que asesore. En realidade, apunta a directora de Innovación, "a única persoa que si está fisicamente connosco en España é o community manager, que aínda que debe ser nativo e coñece-la cultura local, debe estar en contacto directo co equipo español para empaparse ben da enfermidade que se arrinque.

Postos en marcha outros países europeos como Austria, Bélxica, Holanda e Suíza (con 5 ou 6 enfermidades por país), Baonza avanza que "o noso obxectivo é alcanzar os 50.000 usuarios rexistrados para 2015 e triplicar a nosa actividade actual".

Privacidade e proximidade

Un dos trazos distintivos de "Personas Que" é o seu celo pola privacidade dos usuarios rexistrados, polo que non se piden datos persoais nin se permite a publicación de fotografías persoais. "Algunhas das enfermidades, como o trastorno bipolar ou a esquizofrenia, que arrinca neste mesmo mes, están moi estigmatizadas na sociedade e requiren deste tipo de medidas para poder interactuar con total liberdade", sinala Eva Baonza, directora de Marca e Innovación, que advirte que "quixemos prestarlle atención a este tipo de trastornos porque, precisamente polo que complican a integración social, son as que requiren de maior apoio".

Ademais da Comunidade na que interactúan os usuarios, estes tamén dispoñen de dúas potentes ferramentas: por unha banda, o Centro de Datos, onde poden realizar un seguimento da súa enfermidade a través das variables de control máis importantes; e por outro, de aplicacións móbiles que estenden as bonanzas do Centro de Datos grazas á incorporación dos dispositivos móbiles. A aplicación para iPhone de trastorno bipolar xa está dispoñible e aos poucos iranse incorporando o resto, tanto para iOS como para Android. O paciente pode, mesmo, confeccionar informes con gráficos do seguimento das súas variables para compartilo co seu médico.

A terceira das patas de "Personas Que" é a máis informativa, articulada en Experiencias, contadas polos propios usuarios previa supervisión dos community managers e os asesores médicos (especialistas e de medicamento xeral en activo que aparecen co seu número de colexiado); e na Revista, con artigos por enfermidade nunha linguaxe clara e sinxela para calquera nivel de usuario.

Independencia e patrocinio

A fórmula de financiamento pola que apostou o proxecto é a do patrocinio dunha enfermidade, evitando calquera tipo de publicidade e coa máxima de manter a independencia e a rigorosidade no contido. Este coidado pola fiabilidade dos contidos é tal, que mesmo a plataforma está preparada para evita-la aparición de marcas comerciais. "En cada país", explica García, "integramos a base de datos de medicamentos autorizados para que cando alguén escriba unha marca, esta sexa automaticamente substituída polo principio activo".

Os promotores de "Personas Que" móstranse optimistas co seu modelo de negocio, posto que, segundo o seu director xeral, "tódolos laboratorios que nos patrocinan -7 en total-, que asinan por dous anos, xa nos pediron un terceiro e dous deles queren patrocinar outra enfermidade". Algo básico, pois aínda que un patrocinio non cubra integramente os custos de desenvolvemento e mantemento dunha enfermidade (uns 100.000 euros anuais) si é importante ter a alguén detrás. Ademais, coas políticas de Responsabilidade Social Corporativa (RSC) os patrocinios poden chegar máis aló da industria farmacéutica, saltando practicamente a calquera sector.

Con esta política, cabería pensarse que as denominadas enfermidades raras non terán o seu espazo en "Personas Que". Con todo, a través da propia RSC de People Who, cada ano a compañía porá en marcha unha enfermidade que non dispoña de patrocinio externo. "A plataforma cobra especial interese para este tipo de enfermos", explica o director xeral, "porque o seu número é moi reducido pero a súa dispersión xeográfica é moi grande, polo que é moi interesante porlles en contacto".