Dous pacientes de cancro reciben senllas mandíbulas impresas en 3D

A medicina atopou na impresión 3D un bo aliado para crear próteses e obxectos a medida de cada paciente. Vímolo hai pouco con moldes elásticos para o brazo ou cun caso bastante mediático: un transplante de cranio. Agora, en Sur África, vemos como tamén se utiliza esta tecnoloxía para a creación de mandíbulas.

O equipo técnico do hospital de Kimberley anunciou que implantou con éxito dúas mandíbulas de titanio impresas con 3D. Estas dúas intervencións son, respectivamente, a segunda e a terceira vez que se realizan. Aos poucos, vanse consolidando para demostrar que son algo máis que unha demostración técnica.

Mandíbulas a medida

Os dous pacientes, homes de 31 e 20 anos, sufrían casos parecidos: o crecemento dun tumor fixera que a súa mandíbula se deformara e os médicos tivesen que substituíla por un implante temporal de aceiro ata que se curase definitivamente o cancro que lles estaba afectando.

Se lestes ben ata este punto estaredes a pensar: como imprimiron con titanio? Segundo explica a Universidade Central de Tecnoloxía (CUT polas súas siglas en inglés) de Bloemfontein, Sur África, utilizouse po de titanio para sinterizalo por láser de forma selectiva e crear a peza en función das necesidades anatómicas de cada paciente.

Aínda que pode soar como algo realmente custoso, o equipo detrás da operación afirma que é un 20% máis económico que unha operación tradicional. Cando se esculpe a peza nunha máquina de fresado de control numérico desperdíciase máis material. Veremos se logra expandirse e chegar a máis centros médicos.