Economía e Industria informa os emprendedores no ámbito tecnolóxico dos instrumentos e apoios á súa disposición

O director xeral do Igape, Javier Aguilera, participou o pasado venres na presentación en Santiago da Spain Startup Competition, evento centrado en localizar e impulsar os novos proxectos tecnolóxicos, onde informou aos emprendedores neste eido das ferramentas e apoios á súa disposición.

Así, Javier Aguilera destacou o reforzamento dos instrumentos para apoiar o emprendemento en Galicia, no marco da Lei do Emprendemento e da Competitividade, salientando a activación da Unidade Galicia Emprende, preparada para achegar aos emprendedores todos os servizos de apoio, e referiuse tamén á preparación ou reforzamento de redes de business angels, de viveiros e de mentores como instrumentos que facilitarán a creación e o desenvolvemento de novas empresas en Galicia.

Ademais de eliminar con carácter xeral as licencias municipais de obra e actividade, que son substituídas por unha comunicación previa ao Concello, a Lei de Emprendemento contempla varias ferramentas de financiamento. Non só fomenta o capital risco público ¬–a través de Xesgalicia– e privado –os business angels–, senón que apuntala as facilidades para obter microcréditos con xuros bonificados.

A Spain Startup Competition, que se desenvolve en Galicia co apoio do Igape, percorrerá varias cidades españolas para identificar e promover os proxectos tecnolóxicos máis destacados, tanto nas fases de lanzamento como nas de crecemento. Entre os obxectivos do evento están facilitarlles visibilidade, acceso a financiamento, oportunidades de negocio ou posibilidades de acordos ou alianzas con outros proxectos doutras áreas xeográficas.

Ademais de Sofía Benjumea, CEO de Spain Startup, no encontro participou tamén Alejandro Barrera, fundador de Press42, empresa centrada no asesoramiento especializado para empresas de carácter tecnolóxico, especialmente reforzando as súas habilidades de comunicación. Alejandro Barrera é mentor en distintas aceleradoras de proxectos e do Global Shaper (World Economic Forum) en Madrid. No encontro desenvolvido en Santiago participou igualmente a tecnolóxica galega Nanogap, especializada no desenvolvemento e produción de nanopartículas con propiedades antimicrobianas, condutoras ou magnéticas aplicables a sectores industriais tan variados como o de materiais, saúde, enerxía ou electrónica.