Dúas aplicacións móbiles españolas gañadoras dos premios "Mobile for Good Europe"

Dúas aplicacións españolas resultaron gañadoras nas categorías de Educación e Saúde dos premios "Mobile for Good Europe" convocados por The Vodafone Foundation.

A aplicación Contigo alzouse co primeiro premio na categoría de Saúde. Desenvolvida por Wake App Health, Contigo foi creada coa colaboración 16 mulleres que superaron un cancro de mama e expertos médicos. O seu obxectivo é dar apoio a todas aquelas mulleres que sofren a enfermidade, dende o momento do diagnóstico e a través de todo o tratamento. Dispón de testemuños persoais, gráficos interactivos e rigorosos contidos médicos.

Dyseggxia levouse o máximo galardón na categoría de Educación. É unha app realizada por Cookie Cloud que, a través do xogo, axuda aos nenos con dislexia a superar as súas dificultades para aprender a ler e escribir. Integra exercicios con base científica que piden ao usuario completar e separar palabras ou reordenar letras. As tarefas que os nenos deben resolver están sustentadas na investigación que Luz Rello, unha das integrantes do equipo de traballo, está a levar a cabo na súa tese doutoral sobre dislexia na Universidade Pompeu Fabra de Barcelona.

Na categoría de Accesibilidade o xurado decidiu premiar a aplicación ColorADD que axuda ás persoas con daltonismo a entender mellor as cores e asegurar a accesibilidade para todos cando a cor é un factor de identificación, orientación ou selección.

Por último, Bribespot, un servizo anónimo que permite reportar pequenos subornos e casos de corrupción, foi a máis destacada de Servizos Públicos. 

Cada categoría repartiu 50.000 € entre as tres aplicacións mellor valoradas polo xurado 30.000 € para o gañador, 15.000 € para o segundo e 5.000 € para o terceiro.

Este ano presentáronse 224 candidaturas, das que 91 foron españolas. Un xurado especializado seleccionou as tres mellores apps de cada unha das categorías. Dos doce finalistas seis foron españois.

• Saúde

1.Contigo (España)
2.HipTracker (Reino Unido)
3.PebbleMED (Holanda)

• Educación

1.Dyseggxia (España)
2.Special Words (Reino Unido)
3.Lily and the animals (España)

• Accesibilidade

1.ColorADD (Portugal)
2.MindTags (Alemaña)
3.Simple Tweet (España)

• Servizos Públicos

1.Bribespot (Alemaña)
2.Emergency Services App (España)
3.Civic (España)

Os "Mobile for Good Europe Awards" contan co apoio de AGE Platform Europe, plataforma que traballa a favor dos máis de 150 millóns europeos maiores de 50 anos e o European Disability Forum, entidade que representa máis de 80 millóns de persoas con discapacidade en Europa.