A Fundación ONCE lanza o Selo A TECH para acreditar a accesibilidade de produtos e servizos tecnolóxicos

A Fundación ONCE pon a disposición dos fabricantes e desenvolvedores de produtos e servizos tecnolóxicos o Selo A TECH, un distintivo que acredita a accesibilidade para as persoas con discapacidade en produtos e servizos electrónicos que non sexan teléfonos móbiles ou 'tablets' e derivados, para os que existe o selo Amóvil. O Selo A TECH cobre tecnoloxías como Smart TV, computadores portátiles, electrodomésticos intelixentes e consolas de videoxogos.

 

Segundo sinala José Luis Martínez Donoso, director xeral da Fundación ONCE, 'con esta iniciativa queremos recoñecer o esforzo que as marcas tecnolóxicas están a levar a cabo para que todas as persoas, con ou sen discapacidade, poidan gozar dos seus produtos e servizos sen distincións. Ademais, desde a Fundación ONCE traballamos para que esta cuarta revolución non deixe de lado ás persoas con discapacidade, senón que sirva de panca para a súa plena inclusión'.

 

O selo está baseado na norma europea EN 301 549 para verificar que un produto ou servizo tecnolóxico é accesible, tendo en conta os tipos de uso contemplados na devandita norma: uso sen visión ou con visión limitada, uso sen percepción da cor, uso sen audición ou con audición limitada, uso sen capacidade vocal, uso con manipulación ou forza limitadas, uso con alcance limitado e uso con capacidade cognitiva limitada.

 

As entidades interesadas en certificar a accesibilidade das tecnoloxías que desenvolvan ou comercialicen deberán poñerse en contacto coa Fundación ONCE para solicitar unha auditoría de accesibilidade.

 

Unha vez realizada a avaliación, se a tecnoloxía cumpre cos requisitos, emitirase o selo xunto cun documento ou ficha de datos que incluirá a descrición dos criterios de accesibilidade cos que cumpre o produto ou servizo avaliado, así como as barreiras de menor impacto que puidesen existir, xunto a suxestións para eliminalas.

 

Ademais, facilitarase ás entidades os coñecementos necesarios para interpretar adecuadamente as pautas de accesibilidade e resolveranse dúbidas sobre accesibilidade que poidan xurdir no proceso de mellora do dispositivo.