Madrid,
18/01/21 (08:05)
- Un total de 45 mozos con discapacidade puideron mellorar o seu perfil laboral a través do programa de bolsas desta iniciativa da Fundación ONCE, en 2020
Áreas de coñecemento como a Intelixencia artificial, a ciberseguridade, a animación 3D, o Big data e o márketing dixital son algunhas das presentes nos cursos de ensino superior que están a levar a cabo as 45 persoas con discapacidade que lograron obter unha bolsa do programa Por Talento Dixital da Fundación ONCE.
A Fundación ONCE, xunto con Inserta Emprego, puxo en marcha hai un ano a iniciativa Por Talento Dixital, un programa de formación permanente de persoas con discapacidade en competencias dixitais e profesións tecnolóxicas altamente demandadas no mercado laboral.
O programa inclúe unha liña permanente de bolsas de estudo, co fin de apoiar a incorporación a accións formativas no ámbito tecnolóxico e dixital das persoas con discapacidade e promover así a súa inclusión e impulso profesional en empregos técnicos especializados e altamente cualificados.
As accións formativas bolseiras poden ser tanto a tempo completo como parcial, e en calquera das modalidades presencial, online ou mixta. Neste último caso, as accións formativas deberán ser compatibles coa actividade laboral.
Poden solicitar as bolsas contempladas na convocatoria estudantes a partir de 16 anos con discapacidade legalmente recoñecida igual ou maior ao 33% e que posúan o título de Educación Secundaria Obrigatoria ou equivalente, reunindo todas as condicións establecidas nas bases que a regulan.
Ademais, deben estar preinscritos, matriculados ou cursando un programa formativo no ámbito tecnolóxico e/ou dixital impartido por unha institución/entidade acreditada como centro de formación e/ou certificacións en software, linguaxes de programación, frameworks, etc.
Tema: Xeral
Fonte:
Fundación ONCE
[1]