Protéxete coa tecnoloxía

Ante a pandemia do Covid-19 é importante incidir na importancia de coidar a saúde seguindo as recomendacións de seguridade e prevención de contaxios das autoridades sanitarias, xa que estas son simples e efectivas, e ademais a tecnoloxía permitirache evitar ou diminuír moitas das situacións de risco.

Neste contexto, o uso da tecnoloxía darache apoio na atención social, sanitaria e persoal proporcionando seguridade e autonomía, para evitar a soidade e previr riscos.

Reduce as túas saídas á rúa

A principal medida de seguridade que nos afecta a tod@s é a prohibición de saír á rúa pero isto non é impedimento para poder proverse de alimentos ou dos elementos necesarios para facer unha vida normal dentro dos nosos fogares.

A tecnoloxía xunto con multitude de movementos sociais altruístas está facendo posible que moitas persoas reciban esta axuda sen necesidade de desprazarse.  

Por isto, é recomendable delegar nun familiar, profesional ou voluntari@ a compra de alimentos ou mediciñas para evitar saír do domicilio, ou realizar a compra online para proverse destas materias, é outra das medidas máis utilizadas.

Así mesmo temos ao noso alcance ferramentas gratuítas para o aprovisionamento de mediciñas como o mapa web “Preciso a alguén que me baixe á farmacia” que conecta a persoas voluntarias para axudar a persoas que solicitan axuda durante o confinamento. Esta plataforma tamén oferta servicios como supermercados, clínicas veterinarias, centros sociais que ofertan comidas ou mesmo bancos de alimentos.

Tamén organizacións como a Cruz Vermella están a ofertar servicios de asistencia a través dos seus voluntari@s que realizan chamadas de seguimento e detección de necesidades da poboación máis vulnerable, así como o reparto de artigos básicos nos fogares (distribución de alimentos, kits de hixiene ou medicamentos).

Por último, non debemos esquecer seguir unha serie de medidas preventivas á hora de recibir a nosa compra ou calquera paquete na casa:

• Sempre que sexa posible que o deixen na porta.
• Durante o proceso de recollida, é importante non tocar a cara.
• Unha vez retirada a mercancía, é vital lavarse ben as mans con auga e xabón.
• Despois tira a caixa, a bolsa de plástico e o papel no que o recibas.
• Repasa con lixivia a superficie onde apoiaras o paquete, envase ou bolsa.
• Para finalizar, lava de novo as mans durante ao menos 20 segundos. 

Acude ao médico só se é necesario

Tal e como indican as recomendacións do Ministerio de Saúde é fundamental evitar acudir aos centros de saúde e hospitais salvo en caso de urxencia médica.

Durante esta situación de alarma sanitaria debemos ser conscientes da gran afluencia de casos prioritarios que se están a atender nos centros médicos e previr de maneira activa a sobrecarga ou colapso. Así pois, en caso de sufrir febre, tose ou dificultade para respirar, chama ao 900 400 116 para casos leves ou ao 061 nas emerxencias e casos graves.

Para evitar desprazamentos, o Sergas pon a túa disposición os servizos da plataforma E-Saúde [3] onde podes solicitar cita médica de xeito online e consultar os resultados das túas probas ou medicación. Tamén contas co servizo de cita telefónica para a atención por parte dun médico dende o teu domicilio.

Algúns servizos adicionais e de interese que che ofrece esta ferramenta son:

• Acceso a información de asociacións de doentes.
• Acceso a cursos en liña onde afondar sobre temas do teu interese.
• Información de farmacias, centros de saúde, hospitais e servizos de urxencias.

Adicionalmente, o Sergas puxo a disposición de toda a cidadanía o autotest Coronavirus [4] para proporcionar información áxil e actualizada sobre cuestións relacionadas con esta enfermidade e a través de preguntas concretas ofrece recomendacións adaptadas á situación particular de cada persoa. 

A tecnoloxía conéctate e protéxete

Hoxe en día existen unha serie de ferramentas accesibles para todo o mundo que axudan a romper co illamento, potenciar o envellecemento activo, fortalecer e enriquecer a participación social do maior posibilitando espazos de igualdade e permitindo o establecemento de lazos afectivos con persoas que comparten os mesmos intereses, preocupacións e necesidades.

As tecnoloxías aplicables á mellora da calidade de vida son moi variadas e interesantes. As seguintes son só algúns exemplos:

• Sensores ambientais para monitorar movemento, actividades cotiás e situacións de risco no fogar: Desde o acto de coller ou deixar as chaves, tomar un medicamento, abrir ou pechar unha porta ata sufrir un accidente. Todo iso con comunicación e informe a un dispositivo portátil doutra persoa coidadora ou responsable.
• Solucións de conectividade e comunicación persoal que axuden á persoa para comunicarse e compartir con familiares, amizades ou coidadores como:
  • A teleasistencia domiciliaria cun aparato posto ao lado do teléfono e un colar cun botón para premer se ocorre calquera emerxencia.
  • A localización de persoas: un pequeno aparello que serve para ter situada á persoa que o leva en caso de despiste, se perda ou lle pase algo.
  • Teleatención mediante robots: aparellos fáciles de usar para asistir na vida diaria das persoas que fan tarefas como recordatorios de medicación, instrucións sobre exercicios, hixiene persoal, etc.
• Dispositivos portables para monitorar funcións vitais e parámetros clínicos, como o ritmo cardíaco, a respiración, a osixenación, a presión arterial, a glicosa sanguínea e outras.
• Dispositivos para o apoio ou guía para a realización de actividades cotiás, coas alertas e recordatorios apropiados, ben sexa para o propio adulto maior ou para os seus coidadores.

Todos estes son algúns exemplos do que a tecnoloxía che pode ofrecer, pero sabemos que algunhas visitas non se poden evitar como as de profesionais de atención a domicilio, sanitarios, coidadores e familiares que che axudan coas túas tarefas diarias, polo que é importante evitar o contacto ao saudar, mantendo a distancia de seguridade de dous metros, así como ventilar a vivenda todos os días polo menos durante 10 minutos e limpar as superficies en contacto con produtos de limpeza. E adicionalmente:

• Lava as mans con auga e xabón de forma correcta e frecuente.
• Evita tocarte os ollos, a boca e o nariz.
• Utiliza un pano de usar e tirar para esbirrar ou tusir e taparse a boca e o nariz co cóbado cando se tusa.

Nestes días o apoio das ferramentas TIC é vital para previr o illamento e para manterse activos sen esquecer que non estamos sós e proximamente centraremos a publicación en como manternos entretid@s e en contacto con outras persoas grazas á tecnoloxía.