Faite Pequeno, a app de xogos gratuíta para gozar en familia durante o confinamento

• O coronavirus encerrounos a todos en casa. Non podemos (nin debemos) saír nin a pasear. Estamos todos xuntos e revoltos, moitas veces en familia, e as ideas de que facer con tanto tempo extra convivindo vanse esgotando día a día.

A plataforma Faite Pequeno quere achegar o seu gran de area axudando ás familias para transformar este tempo no que nos vemos forzados a estar recluídos na casa nunha oportunidade para pasar tempo de calidade e diversión. Con este fin Faite Pequeno pon ao alcance de todos, completamente gratis e para sempre, a súa APP de xogos, na que se poden atopar entretidas e orixinais ideas para xogar e divertirse en familia.

Esta APP con máis de 60 xogos está dispoñible para a Apple Store para iOS e en Google Play para Android, e ofrece novas e creativas ideas para xogar cos nosos fillos durante estes días de confinamento. O obxectivo é conseguir tempo de calidade cos máis pequenos, grazas aos divertidos xogos que ofrece. Estes xogos en familia permiten desenvolver habilidades como a psicomotricidade, relacións en familia, coordinación, memoria e concentración, entre outras. Ademais, incorpora filtros para localizar o xogo que mellor se adapte a cada familia.

Faite Pequeno é unha iniciativa altruísta impulsada por dúas mozas emprendedoras, a escritora Olga del Ama (Dirección) e a ilustradora Elena Villar (Deseño). A idea xorde dunha iniciativa persoal: apoiar aos seus respectivos irmáns como co-educadoras de cada un dos seus sobriños. Tan en serio se tomarons este labor que o converteron neste gran proxecto, Faite Pequeno. Xogar con Faite Pequeno facilítanos reconectar co noso neno interior e sentir, relacionarnos e ver o mundo con novos ollos: os dos nenos.