A Fundación ONCE lanza a canle "EmprenYOUtuber", unha ferramenta de comunicación para emprendedores con discapacidade

 

A Fundación ONCE puxo en marcha unha nova campaña para animar ás persoas con discapacidade a desenvolver o seu propio proxecto de negocio. Trátase da canle "EmprenYOUtuber", unha ferramenta de comunicación dirixida a emprendedores con discapacidade dentro do proxecto "Por Talento Emprende".

 

Segundo explicou Sabina Lobato, directora de Formación e Emprego, Operacións e Transformación da Fundación ONCE, esta iniciativa enmárcase no labor que vén realizando a Fundación ONCE de apoiar a emprendedores con discapacidade co obxectivo de xerar novas oportunidades de emprego. "Como sabemos a taxa de emprego é moi baixa, só 1 de cada 4 persoas con discapacidade en idade laboral ten traballo", subliña.

 

A través desta canle os interesados poden atopar catro vídeo titoriais protagonizados por Miriam Fernández. É cantante, actriz e emprendedora, e desde este proxecto como "emprenyoutuber", ofrece a súa axuda para emprender. "Estou á vosa disposición a través desta canle para axudarche a lograr os teus soños. Para contarche todas as claves para lanzarte ao emprendemento", sinala.

 

A campaña conta co apoio do Ministerio de Traballo, Migracións e Seguridade Social, a través da Dirección Xeral do Traballo Autónomo, da Economía Social e da Responsabilidade Social das Empresas.

 

Desde a súa creación en 1988, a Fundación ONCE concedeu máis de 10 millóns de euros en axudas a case 1.800 emprendedores con discapacidade. Na actualidade mantén aberta unha convocatoria pola que destinará 2,6 millóns de euros a impulsar proxectos de emprendemento de persoas con discapacidade. A Dita convocatoria permanecerá aberta ata que se esgoten os fondos destinados a este programa, cuxo período de execución alcanzará o ano 2022. 

 

Trátase de axudas a fondo perdido que van desde os 3.000 ata os 18.000 euros cofinanciados no marco do Programa Operativo do Fondo Social Europeo de Inclusión Social e Economía Social.

 

As axudas teñen en conta a situación sociolaboral do solicitante e a súa contorna familiar. Poderán recibir ata 2.000 euros máis os colectivos con discapacidade con especial dificultade, entre eles persoas con parálise cerebral, enfermidade mental ou discapacidade intelectual. Tamén se primará a vítimas de violencia de xénero, mulleres, parados de longa duración, maiores de 45 anos, inmigrantes e fogares en situación de vulnerabilidade.