Tech Kids afronta a recta final do verán cunha ducia de actividades argalleiras máis

Metidos xa de cheo no mes de setembro, prosegue a actividade formativa, divulgativa e argalleira do Colexio Profesional de Enxeñaría en Informática de Galicia (CPEIG [2]) e máis a Axencia para a Modernización Tecnolóxica de Galicia (AMTEGA [3]) ao abeiro de Tech Kids [4], programa itinerante de obradoiros dirixido a mostrar á rapazada as vantaxes das novas tecnoloxías dun xeito cen por cen participativo. Ou sexa, facendo todo o posíbel para que as nenas e nenos sexan tamén creadoras de tecnoloxías. Tech Kids, que xira arredor da robótica, a creación de personaxes para videoxogos ou a pilotaxe de drons, ten deparadas aínda unha ducia de accións antes do seu remate.
Hoxe mesmo celébrase unha xeira de pilotaxe de drons en Valga (na aula CeMIT de 9 a 14 horas) e outra sobre robótica en Fisterra (na Aula de Deportes do Concello, de 9 a 14 horas).
Mañá, 12 de setembro, Tech Kids e os seus obradoiros activos sobre vehículos aéreos non tripulados recalan en Celanova (aula CeMIT, de 9 a 14 horas). Na mesma xornada, celébrase unha acción creativa sobre robótica en Pontedeume, tamén na aula CeMIT local, en horario de 9 a 14 horas.
Como lembraremos, o obxectivo do programa Tech Kids é “fomentar o talento dixital das nenas e nenos de toda Galicia” ao tempo que “se mellora a conciencia entre a xente nova de que a aplicación de computación e codificación para os problemas sociais reais pode axudar a cambiar o mundo”.
Ao abeiro do programa, como dixemos, estanse a organizar (dende o mes de xuño) sesións de iniciación na pilotaxe de drons coma as que se desenvolven esta semana. Estas xornadas están destinadas a rapaces e rapazas de entre 8 e 16 anos, que coñecerán as súas partes, como se montan e como son capaces de voar. Tamén farán unha práctica empregando dous tipos de aeronaves: un overcraft (para entender os controis e movementos) e un dron co que percorrerán un circuíto e mesmo competirán entre eles.
As iniciacións aos vehículos aéreos non tripulados proseguirán estes días en Ribadeo (día 13, na Sala de Cultura) e máis en Vimianzo (día 14, na aula CeMIT da Casa da Cultura, de 10 a 15 horas). O día 14 de setembro celébrase en Narón unha xornada sobre deseño de personaxes para videoxogos (aula CeMIT da Antiga Casa do Concello). Esta actividade sobre creación de persoeiros dixitais recalará o día 15 en Leiro (na aula CeMIT, en horario de 15 a 21 horas), en Guitiriz (o 21 de setembro, na aula CeMIT, de 15 a 21 horas) e máis en Pontedeume (o 22 de setembro, na aula CeMIT do centro FOREMDES, en horario de 9 a 15 horas).