A TIC duplica as prazas dos cursos de novas tecnoloxías para maiores de Lugo

A Fundación TIC da Deputación lucense [3], a través do Centro de Innovación Social InLugo [4], impartirá 64 cursos e obradoiros gratuítos no cuarto trimestre de 2017, é dicir, 21 máis que na anterior edición. O Presidente da TIC e da Deputación, Darío Campos, presentou o programa de actividades de novas tecnoloxías destinadas ás persoas de máis de 55 anos, que suman un total de 877 prazas, o dobre que no trimestre anterior e que comezará o 13 de setembro.

 

Campos, que estivo acompañado pola alcaldesa de Lugo, Lara Méndez, dixo que “neste trimestre imos reforzar o labor social que está a desenvolver a TIC cun sensible incremento no número de cursos e prazas. Queremos atender así a alta demanda que temos e achegar ao maior número posible de maiores os beneficios que ten o uso das novas tecnoloxías na súa vida cotiá, nas súas relacións sociais, na súa saúde e na súa autonomía persoal”.

Segundo o titular da Deputación “os lucenses de máis de 55 anos que xa pasaron por estes cursos son  o mellor exemplo de que as novas tecnoloxías, ademais de útiles para mellorar a súa calidade de vida, son moito máis doadas de empregar do que parece". Por iso, engadiu, "quero animar aos nosos maiores a que se apunten a estas actividades e venzan o medo a estar desfasados. Aquí, ademais, atoparán novos amigos e formarán parte da familia da TIC”.

 

Os cursos serán de diversa duración: 37 serán de dous ou tres días, mentres que os outros 27 terán unha duración dun día. Estes últimos, que se impartirán os luns pola mañá e pola tarde e os venres pola mañá, están especialmente dedicados ao reforzamento de coñecementos, e necesitarán inscrición previa para cabida a todos os demandantes e poder distribuímos nos correspondentes días.

 

Con respecto ás materias, Campos anunciou que “aumentaremos o número de aqueles cursos con máis demanda, os do uso do móbil e de Internet. Pasarase de dúas a tres edicións, tanto do primeiro nivel como do segundo”. Tamén salientou que “os obradoiros destinados á mellora da memoria e das habilidades cognitivas e psicomotrices, como os de Xbox ou Wii, que fomentan este tipo de exercicios mentais”. 

A tenor do éxito da anterior tempada, concluiu, este trimestre haberá oito obradoiros de memoria. Ademais, dentro da programación as persoas maiores da provincia poderán elixir entre talleres de redes sociais, correo electrónico ou uso de whatsapp, entre outros.