A Fundación ONCE presenta o seu proxecto de aceleradora de startups de innovación social

 

O próximo 3 de outubro terá lugar, dentro da feira sobre emprendemento South Summit 2019, a presentación do proxecto "espacIA". Trátase dunha iniciativa de aceleración de startups de innovación social posta en marcha pola Fundación ONCE co obxectivo de promover iniciativas empresariais que dean resposta ás necesidades das persoas con discapacidade.

 

O proxecto será presentado por Alberto Durán, vicepresidente executivo da Fundación ONCE, xunto con María Benjumea, fundadora e CEO do South Summit, quen intervirá nun "Dialogo sobre impacto social e discapacidade" moderado polo xornalista Juanma Romero.

 

Ademais, tamén estarán presentes Jesús Hernández, director de Accesibilidade Universal e Innovación da Fundación ONCE, xunto con tres emprendedores: Faustino Cuadrado, CEO de Mass Factory; Rafael Olmedo, de Geko Navsat, e Marco Palacios, de The Sideways Project. Todos eles recibiron o apoio da Fundación ONCE. 

 

Xunto a eles, participarán Alberto Tornero, director da área de empresas de alto potencial de PWC, e Elena García, máxima responsable de Marsibionics, unha startup e spinoff do CSIC adicada ao deseño de exoesqueletos pediátricos.

A presentación terá lugar o próximo 3 de outubro no marco do South Summit baixo o epígrafe "The Next big think: Closing the Gap, acelerando capacidades".

 

Por outra banda, a Fundación ONCE contará cunha caseta propia onde os visitantes poderán ver diversos modelos de exoesqueletos desenvolvidos por Marsibionics, así como a cadeira de rodas xiratoria de The Sideways Project. Ademais, gozarán dunha demostración por parte de Geko Navsat da aplicación de guiado de contornas naturais que se está utilizando no proxecto Camiño de Santiago.

 

South Summit é unha plataforma de innovación que conecta startups, investidores e corporacións, centrada en oportunidades de negocio e tendencias disruptivas. O seu obxectivo principal é o de crear conexións entre os actores do sistema. Este ano a feira celébrase do 2 ao 4 de outubro en La Nave (Rúa Cifuentes 5, en Madrid).

 

O evento inclúe un programa de conferencias, unha competición de startups e ferramentas de networking e un Marketplace, onde as startups mostran as súas solucións ao público.

En 2018, o South Summit contou con máis de 16.000 asistentes e máis de 500 representantes dos medios de comunicación, 6.800 empresas e 750 investidores. Trátase dun evento de referencia internacional no mundo do emprendemento.